PASAL I
AL-FASLU L-AWWALU
FI BAYANI MA'RIFATI L-LAHI TA'ALA
Pasai nyang phon wahe sahbat
Ma'rifat Ion peunyata
Ma'rifat keu Tuhan ngon keu Nabi
Na lhee bagi bak meuhingga
Wajeb mustahe lhee ngon jade
Dum beu abeh neukeunai nyata
Soe han keunai sifeuet Tuhan
Page zaman lam nuraka
Sifeuet wajeb le bak Tuhan
Hana ensan ek jihingga
Hana wajeb takeutahui
Tapeusali tapeunyata
Seubab hana tateumee dali
Hankeu meukri brat bak hamba
Sifeuet dua ploh wajeb tathee
Seubab tateumee dalijih na
Toh dua ploh wahe tuan
Jinoe Ion kheun tabileueng sa
Sifeuet nyang phon nama wujud
Makna lanjut hanku bawa
Hareutoe wujud na zat Tuhan
Sifeuet jimeunan nafsi nama
Wujud Tuhan han ek kheun kri
Han soe tupeue asai mula
Keudua qadim sifeuet Tuhan
Makna teelan Ion calitra
Hareutoe qadim na dileekon
Hana muphon han mumasa
Nabi dan wali han troh makrifat
Bak keunai zat Allah Ta'ala
Akai han troh pike han meukri
Eleumee teurheunti keupadanya
Keulhee baqa' sifeuet Allah
Makna Ion peugah ubak gata
Hareutoe baqa' hana ubah
Keukai Allah rok-rok masa
Ban nyang awai meunan cit ache
Han troh pike ngon bicara
Bicara sisat pike singkat
Akai dahsyat pungo gila
Sifeuet nyang peuet mukhalafah
Makna Ion peugah kucalitra
Hareutoe mukhalafah beursalahan
Hana saban Tuhan ngon hamba
Hana saban neumeutuboh
Han sapeue roh mee tapeusa
Miseuepi tan teuladanpi han
Wujud Tuhanteu Nyang Esa
Keulimong sifeuet qiyamuhu
Lon kheun laku hareutoe makna
Qiyamuhu lon kheun hareutoe
Neudong keudroe Allah Ta'ala
Han neukheundak nyan keu teumpat
Tuhan nyang that amat kaya
Ngon neukheundak nyan keu pie
Hana sabe Allah Ta'ala
Nam wahdaniyah sifeuet Tuhan
Makna teelan kucalitra
Hareutoe wahdaniyah sidroe Tuhan
Han bilangan sa ngon dua
Han sikutu Tuhan seubagi
Maha suci Allah Ta'ala
Daem kaem mee cit sidroe
Hana sapeue nyang na seureuta
'Arasy goh na kursiy gohlom
Qadim Tuhan sit ka lama
Nyang limong nyan sifeuet salbi
Nak taturi he syeedara
Hareutoe salbi tulak lawan
Sifeuet nyang tan bak Allah Ta'ala
Jinoe lon peugah sifeuet ma'ani
Soe nyang turi mubahgia
Hareutoe ma'ani nyang dong bak zat
Tadeungo sahbat lon calitra
Tujoh sifeuet nanjih hayat
Tadeungo sahbat lon boh makna
Hareutoe hayat udep Tuhan
Hana badan hana nyawa
Adat udep badan ngon nyawa
Ka seurupa ngon manusia
Hana layak neumeusifeuet
Meunan wujud Tuhan Nyang Esa
Lapan sifeuet jimeunan 'ilmu
Tadeungo laku lon boh makna
Hareutoe ilmu neuteumuban
Dum seukalian abeh nyata
Neuteumuban han ngon akai
Hana sagai ngon bicara
Neuteumuban cit ngon eleumee
Meunan nyang mee tapeucaya
Adat neutuban nyan ngon akai
Kakeu zawai saboh masa
Sikureueng sifeuet nan iradat
Taklok meuhad bak mumkina
Hareutoe iradat neumeukheundak
Ban nyang layak neukaronya
Neumeukheundak han ngon napsu
Han sikutu manusia
Neumeukheundak ngon iradat
Meunan sahbat tapeucaya
Adat neumeukheundak nyan ngon napsu
Ka sikutu manusia
Siploh sifeuet nanjih qudrat
Taklok meuhad miseue nyang ka
Hareutoe qudrat kuasa Tuhan
Neupeuna neupeutan sikiep mata
Han ngon tuleueng han ngon urat
Kuasa that Allah Ta'ala
Adat kuasa tuleueng ngon urat
Leumah leumbot akhe puasa
Siblah sam'un sifeuet Tuhan
Taklokjih nyan bak mawjuda
Hareutoe sam'un neumeudeungo
Got nyang meusu got nyang hana
Wujud nyang na dum seukalian
Deungo Tuhan tan neubasa
Poteu Allah hana geulunyueng
Dum sibarang neudeungo suara
Nyang deumeungo cit ngon sama'
Meunan ijmak dum ulama
Dua blah basar sifeuet Tuhan
Taklokjih nyan miseue nyang ka
Hareutoe basar neukeumalon
Di 'arasykon tahtas sara
Hana bacut neumeusilee
Han ban lagee kalon mata
Kareuna mata nan bak Tuhan
Neungieng seukalian dum ngon basar
Lhee blah kalam sifeuet Tuhan
Taklokjih nyan miseue nyang ka
Hareutoe kalam marit Allah
Hana harah ngon suara
Adat neumarit nyan ngon lidah
Ka meuharah kalam Esa
Sifeuet Tuhan tilek meunan
Beu got tafam tapeucaya
Nyang tujoh nyan nak taturi
Sifeuet ma'ani he syeedara
Hareutoe ma'ani nyang dong bak zat
Miseue hayat nyang mulia
Ma'nawiyat jinoe Ion peugah
Gaseh Allah soe peucaya
Peuet blah sifeuet nanjih hayyun
Meuato turon Ion calitra
Hareutoe hayyun zat nyang udep
Meunan sabet tapeucaya
Pakri neuudep Tuhanteu sidroe
Ngon udep droe seulama-lama
Laen bandum seukalian
Jen ngon ensan udep ngon nyawa
Bayang-bayang wujud Tuhan
Bak barang seukalian alam donya
Hingga udep dum geutanyoe
Geunap nanggroe seugala donya
Abeh udep gadoh kuat
Muwoe hayat Allah Ta'ala
Sifeuet 'âlimun geunap limong blah
Makna kupeugah kucalitra
Hareutoe 'alimun nyang teumuban
Dum seukalian padok hana
Pakri neutuban Tuhanteu sidroe
Ngon tuban droe seulama-lama
Jen ngon ensan neubri eleumee
Ka neubri thee seugala donya
Bayang-bayang eleumee Tuhan
Neubri teunuban dumna hamba
Hingga tatuban dum geutanyoe
Geunap nanggroe seugala donya
Abeh teunuban gadoh lagee
Muwoe eleumee Allah Ta'ala
Sifeuet muridun geunap nam blah
Meunan syiah neuboh makna
Hareutoe muridun nyang beurkheundak
Peu nyang layak neukaronya
Pakri neukheundak Tuhan sidroe
Ngon kheundak droe seulama-lama
Laen bandum seukalian
Neubri kheundak seugala donya
Bayang-bayang kheundak Tuhan
Neubri seukalian dumna hamba
Abeh kheundak muwoe ibarat
Muwoe iradat Allah Ta'ala
Tujoh blah sifeuet nan qadirun
Meuato turon Ion calitra
Hareutoe qadirun zat nyang kuat
Kuasa that Allah Ta'ala
Pakri kuasa Tuhanteu sidroe
Ngon kuasa droe nantiasa
Laen bandum seukalian
Mbak Tuhan bri kuasa
Bayang-bayang kuasa Tuhan
Neubri seukalian manusia
Abeh kuasa gadoh hareukat
Muwoe qudrat Allah Ta'ala
Sifeuet sami'un geunap lapan blah
Muwafakat syiah meunan makna
Hareutoe sami'un nyang meundeungo
Hana klo dum suara
Pakri neudeungo Tuhanteu sidroe
Ngon deungo droe rok-rok masa
Lawan bandum peundeungoran
Karonya Tuhan dum keu hamba
Gadoh peundeungo teuka tuloe
Sami'un muwoe bak Allah Ta'ala
Sifeuet basirun kureueng sa dua ploh
Tadeungo Ion boh jinoe makna
Hareutoe basirun nyang keumalon
Dum seukalian padok hana
Pakri neukeumalon Tuhan sidroe
Ngon kalon droe seulama-lama
Laen bandum seukalian
Karonya Tuhan kalon mata
Bayang-bayang keumalon Tuhan
Neuhantarkan dumteu rata
Hingga keumalon dum geutanyoe
Geunap nanggroe seugala donya
Abeh keumalon dum seukalian
Muwoe basirun bak Allah Ta'ala
Dua ploh sifeuet mutakallimun
Tadeungo polem Ion boh makna
Hareutoe mutakallimun Tuhan marit
That keubit tapareksa
Pakri neumarit Tuhanteu sidroe
Ngon narit droe nantiasa
Laen bandum seukalian
Karonya Tuhan harah basa
Abeh narit gadoh ngon fam
Muwoe kalam Allah Ta'ala
Troh ngon ajai sampoe tanggoh
Pinjaman tujoh geucok bak gata
Abeh muwoe pinjaman tujoh
Tinggai tuboh han sakon guna
Kakeu teuduek miseue bateueng
Han sigupang le hareuga
Teuka wareh asoe gampong
Geujak kunjong mayet gata
Teuma geuboh lam liang lahat
Dalam jeurat sidroe gata
Adat han amai keubaekan
Sidroe teelan lam keureunda
Seupotpi that kubupi arat
Leumah teumpat lam nuraka
Teuka adeuep mubagoe-bagoe
Nyum-nyum tawoe u lam donya
Yoh nyan teulah tanyeusai droe
Taduek tamoe dalam keureunda
La ilaha illallah
Kubu luah soe tem gata
'Oh noe abeh saboh tanbeh
Laen ureh jinoe takira
Sifeuet nyang wajeb ka taturi
Nyang mustahe pakri rupa
Hareutoe mustahe hana patot
Tuto karot han mee buka
Nyang mustahe wahe taleb
Lawan wajeb tapareksa
Miseue fana takheun Tuhan
Ngon baharu takheun nyata
Miseue muphon takheun dudoe
Sang geutanyoe takheun rupa
Miseue neudong ngon soe laen
Di bilangan takheun dua
Miseue klo takheun Tuhan
Han tatuban dum peukara
Miseue beunci keu makhlukat
Leumoh qudrat Allah Ta'ala
Han ghafara ngon keumalon
Ngon klo Tuhan buta mata
Nyankeu teelan nyang mustahe
Beu tapike dumteu rata
Nyang mustahe kakeu abeh
Jinoe jaed Ion calitra
Hareutoe jaed nibak Tuhan
Neupeujeuet alam dum barangna
Miseue neubri kaya gasien
Saket badan mangatpi na
Miseue mukmin neuboh lam jannah
Mee neupinah lam nuraka
Miseue kafe neubri Jam adeuep
Muwoe lom nekmat neukaronya
Meunan teelan nibak 'aqli
Nibak syar'i pakri rupa
Bak syar'i wajeb meuhad
Mukmin teumpat lam syeuruga
Miseue kafe page dudoe
Wajeb geupasoe lam nuraka
Jaeh bak 'aqli deungon syar'i
Miseue 'asi darohaka
Haruh neuampon ngon han teebat
Ri nyang umat darohaka
Meunan teelan nibak 'aqli
Ngon syar'i sajan dua
Nyankeu miseue jaed bak Tuhan
Ka seumpornaan lhee peukara
'Oh noe abeh saboh pangkat
Ma'rifat saboh tangga
Pasai nyang phon 'oh noe keumah
Jinoe Ion tamah pasai dua
* * *
Tidak ada komentar:
Posting Komentar