PASAL VIII
AL-FASLU S-SAMINU
FI BAY ANI MA YAJIBU L-GHUSLU WA SYURUTUHU WA FURUDAHU
Pasai lapan tadeungo jinoe
Wajeb manoe lon peunyata
Wajeb manoe ubak ensan
Na nam teelan bak calitra
Nyang awai phon mate ensan
Wajeb teelan pumanoe sigra
Keudua hed keulhee nifah
Keupeuet wiladah budak nyata
Keulimong jimak deungon estri
Keulua mani nam peukara
Nyankeu seubab wajeb manoe
Abeh 'oh noe lon calitra
Peureulee manoe na dua ban
Tadeungo teelan lon calitra
Peurtama niet taboh hadah
Sajan tasrah phon angeeta
Dua peukara ie beu taboh
Jeuep-jeuep tuboh ie beu rata
Wajeb beu rata ie jeuep-jeuep bulee
Di yup gukee kalang bek na
Jeuep angeeta nyang meulipat
Dalam pusat bak istinja
Dalam geulunyueng dalam idong
Wajeb tasurung ie beu rata
Lam ok sanggoi lam gaki crah
Bibi mirah ie beu rata
Nyan peureulee jinoe sunah
Deungo amanat lon bak gâta
'oh ka sarejunub badan
Wajeb teelan manoe sigra
Sare putoh nifah ngon hed
Tapeuase Ie ngon tima
Minyauk ulee kruet bee-beewan
Sunat meunan takeurija
Tamita ie meunyucikan
Tasrah badan pat nyang leuta
Sunat yoh nyan tueng ie seumbahyang
Meunan abang phon tamuia
Lheueh nibak nyan nap u Barat
Hadap kiblat nyang mulia
Lheueh nyan taple ie bak jasad
Uneun sunat phon tamula
'Oh lheueh uneun teuma kiri
Ulee gaki ie beu rata
'Oh lheueh kiri likot hadapan
Meunan teelan bek talupa
Takumue ie dalam babah
S,unat tasrah tiga-tiga
Gusuekpi lhee sampohpi lhee
Upa ulee ie beu rata
Manoepi lheueh do'a ase
Tabaca Ie bek talupa
Bek tuwo do'a wahe sahbat
Nap u Barat bak tabaca
Asyhaduan la ilaiha illa l-läh
wahdahu la syarika lahu
wa asyhadu anna muhammadan 'abduhu
wa rasuluhu al-lahumma j'alni
mina t-tawwabina wa j'alni mina
l-mutatahhirina subhanaka l-lahumma
wa bihamdika asyhadu an la ilaha
illa anta astaghfiruka wa atubu ilaika
wa salla l-lahu 'ala sayyidina muhammadin
wa 'ala alihi wa sahbihi wa sallim
Peureulee sunat ka lon peugah
Jinoe faidah lon calitra
Soe nyang sigra manoe janabat
Ase rahmat raya fahla
Bak na meunan nyang peureulee
Awai watee teubiet faja
Jeuep titek ie nibak jasad
Malaikat Tuhan peuna
Malaikat nyan lakee ampon
Keu ulon nyang manoe sigra
Jiucap teuseubeh akan Tuhan
Fahlajih nyan muwoe keu gata
Di phon jinoe 'an kiamat
Karonya hadarat han ek hingga
Soe nyang akhe manoe janabat
Deesya Ie that han ek hingga
Meunyo manoe awai suboh
Deesya gadoh fahla teuka
Meunyo manoe manyang uroe
Seksa dudoe han ek hingga
Dum on kayee keunong uroe
Na dum nyoe naleueng donya
Blangpi peunoh glepi tiwah
Adat leumah teuman deesya
Soe nyang lambat manoe janabat
Di akhirat keunong seksa
Keupeue manoe teuma dudoe
Ngon ie apui lam nuraka
Geuple di ulee teubiet rot pinggang
Abeh tutong dum angeeta
Pruetjih putoh abeh cre-bre
Dum meuure dalam nuraka
Jan kiamat teuma dudoe
Jaroe eungkoe gaki geusangga
Geusangga ngon rante nuraka jahnam
Mukajih leumbam angoh nuraka
Laen nibak nyan deesya lon peugah
Malaikat hafadah meuseurapa
Seubab han jeuet neupeurab keunan
Neudong yoh nyan nibak hawa
U langet han troh u bumoe meunan
Kutika nyan meuseurapa
Tuhan teurimong do'a malaikat
Ingat he sahbat soe bahgia
Abeh lon peugah laba rugoe
Bandua peue fahla ngon seksa
La ilaha illallah
Karony Allah ampon deesya
Pasai lapan 'oh noe bileueng
Jinoe sikureueng lon calitra
* * *
Tidak ada komentar:
Posting Komentar