PASAL VII
AL-FASLU S-SABI'U
FI BAY ANI N-NAJASATI WA IZALATIHA
Pasai nyang tujoh jinoe lon peugah
Najih ngon tasrah sajan dua
Tiep-tiep caye lagi mabok
Najih suntok geuboh nama
Laen nibak nyan keumeh, tahi
Anjeng babi arak pula
Bagi najih na peuet cabeueng
Sira bileueng lon kheun nama
Bagi nyang phon mutawasitah
Mughalladah dua peukara
Keulhee najih mukhaffafah
Hukmiyah peuet peukara
Nyankeu najih keu peuet cabeueng
Maseng-maseng syaratjih na
Beukeusit najih mutawasitah
Syarat tasrah lhee peukara
Bee bak gadoh rasa bak hilang
Rupa tapandangpi bek nyata
Miseue iek ek bak hayawan
Tuak tuan arak pula
Beukeusit najih mughalladah
Syarat meutamah sinan dua
Tacuci ngon ie tujoh kali
Tanoh suci sajan seureuta
Tanoh taboh sep seukali
Han peue lagi le tabawa
Miseue anjeng nyan ngon babi
Peue nyang jadi nibak dua
Beukeusit najih mukhaffafah
Syarat tasrah ie beu rata
Got na ile got han ile
Nyang teumpat nyan sucijih ka
Nyan miseue iek aneuk agam
Nyang teungoh mom mantong bak ma
Makeuen minompi hana lom
Umu dua thon goh seumporna
Beukeusit najih hukmiyah
Syarat tasrah ie beu rata
Lagi ile ateueh teumpat
Nyankeu syarat ka seumporna
Jadi suci dumpeue tasrah
Dua kulah ie tamita
Meunan meunan wahe tuan
Suci makanan hana ceuma
Makanan haleue jeuet keu haleue
Hana sapeue na meudeesya
Ate peungeuh redeuki mudah
Allah tamah beureukat teuka
Ureueng nyang suci gaseh Tuhan
Wahe teelan bek talupa
La ilaha illallah
Nyan kalimah nyang that mulia
Beu na taucap kalimah syahadat
Wahe sahbat dumteu rata
Ureueng lakoe ureueng binoe
Kalimah nyoe bek talupa
Pasai nyang tujoh ka seuleusoe
Lapan jinoe mee takira
* * *
Tidak ada komentar:
Posting Komentar