PASAL II
AL-FASLU S-SANI
FI BAY ANI D-DALILI WA T-TA'ALLUQI
Pasai nyang dua jinoe Ion peugah
Dali na Allah Ion peunyata
Laen nibak nyân Ion boh sajan
Sifeuet Tuhan taklokjih na
Lon boh sueue jaweueb sajan
Jinoe lon kheun tadeungo nyata
Tohkeu dali wahe teelan
Wujud Tuhanpi takheun na
Zat ngon sifeuet hana meukri
Han torn jieu uleh mata
Baranggasoe han torn takalon
Pakri takheun wujudneu na
Zat han meukri sifeuet han muban
Leumahpi tan taeu rupa
Teungku deungo ulon peugah kri
Wujud dali zat Nyang Esa
Dali wujud na zat Tuhan
Baharu alam sigom donya
Toh ri alam cuba peugah
Lon deungo sah tapeunyata
Tiep-tiep wujud laen bak Allah
Nibak nyang salah alam donya
Miseue 'arasy deungon kursiy
Miseue bumi langet donya
Jen ngon ensan malaikat
Jeuneh lat-batat asoe donya
Nyankeu alam ka lon peugah
Ladom leumah ladom hana
Miseue nanggroe likot Buket Qaf
Luah luah Nabi peuhaba
Patbu tathee baharu alam
Peugah teelan lon deungo nyata
Gata goh na jih ka dilee
Patbu tathee baharu nyata
Miseue langet nyan ngon bumoe
Goh geutanyoe jih sit ka na
Teungku deungo ulon peugah kri
Nyang jeuet dali baharu nyata
Ladom bak alam 'arad nyang baharu
Nyankeu teungku jeuet keu tanda
'Arad teungku han lon turi
Pakri-pakri saleh rupa
Hareutoe 'arad han dong keudroe
Meukon na soe ho jitem na
'Arad jidong cit bak jirem
Miseue teukhem manusia
Miseue puteh bak keureutan
Miseue mirah bak keusumba
Miseue rasa bak makanan
Miseue bee-beewan nibak bunga
Miseue tutong nibak apui
Miseue dirui angen bawa
Miseue eleumee aong bak ensan
Miseue saktian bak angeeta
Nyankeu 'arad ka lon peugah
Ladom leumah ladom hana
Patbu tathee baharu 'arad
Toh peungeunai cuba nyata
Teungku deungo ulon peugah
Ubah-ubah rok-rok masa
Meujan meuiem meujan meugrak
Dilee budak dudoe tuha
Siat sijuek siat tutong
Ladom seudong ladom naga
Meujan jiek meujan jitren
Kaya gasien agam dara
Miseue riyeuek ngon geulumbang
Miyup manyang taeu rupa
Jipot ribot beudoh geulumbang
Deuh tapandang deungon mata
Siat ujeuen siat keumaroe
Meunan bagoe dum peukara
Udep mate dum seukalian
Na nibak nyan alam donya
Nyakeu dali baharu 'arad
Seumpurna akai soe tem kira
Nyankeu lon kheun dali na Tuhan
Baharu alam sigom donya
Sifeuet dua ploh wajeb tathee
Seubab tateumee dalijih na
Tohkeu dali nyang jeuet tathee
Pakri eleumee cuba nyata
Jinoe lon kheun wahe sahbat
Dali tatupat bak meuhingga
Siploh sifeuet alam dali
Jinoe lon kheun kri tabileueng sa
Sifeuet wujud ngon wahdaniyat
Keulhee sabet hayat nama
Qudrat, iradat, 'alimun, hayyun
Qadirun, muridun sikureueng ka
Siploh sifeuet na 'ilmu
Dali alam bansineuna
Adat hana siploh sifeuet
Alam han jeuet neupeurupa
Nyankeu sapat dali lon peugah
Jinoe lon kisah nyang keudua
Nyang nam sifeuet dali kitab
Hadih ijmak kheun ulama
Murad kitab firman Allah
Murad hadih kheun anbia
Murad ijmak muwafakat syiah
Hana ubak bak bicara
Nyang nam sifeuet cuba peugah
Takheun beu sah lon deungo nyata
Sama', basar keulhee mutakallim
Dum taslim maseng tangga
Adat hana hadih, firman
Sifeuet nyang ham han soe thee na
Dua nyang ka teuma jinoe lhee
Maseng sukee teumpatjih na
Peuet sifeuet treuk sifeuet Tuhan
Dalijih nyan dua peukara
Dur tasalsul ngon mustahe
Nyankeu dali dua peukara
Hareutoe dur peurheuntian
Meugisa ban ilang sutra
Peuet sagoejih jimupreh-preh
Peue han jadeh lom jibungka
Peuet sagoejih tulak deungki
Jikheun peureugi dilee gata
Teuma jijak meukeukawan
Sajan-sajan meugeugisa
Banpeuet dilee banpeuet dudoe
Pike adoe ngon bicara
Banpeuet dilee jiangkee droe
Banpeuet dudoe jimeudawa
Dawa jinoe han teusawur
Ban laku dur-saboh rupa
Meunankeu miseue saboh ato
Le banpi Ie bak bicara
Hingga meuri phon ngon akhe
Nyankeu mise Ion calitra
Hareutoe tasalsul peuratoran
Abehjih han bak tahingga
Ban miseue ban riyeuek di laot
Meuteututrot hana reuda
Riyeuek meualon seun-seun sidroe
Hana padoe keunan jiteuka
Maseng-maseng na soe ikot
Bineh laot dum jiteuka
Jisumpom droe seun-seun saboh
Akai gadoh bak tahingga
Buet tasalsul nana seuneulheueh
Maken ateueh maken lanja
Tuhan geutanyoe hana baharu
Han ban laku miseue gata
Sifeuet nyang phon jinoe qadim
Lheueh nibak nyan teuma baqa'
Mukhalafah, qiyamuhu
Peuet teurteuntu ka seumporna
Abeh hisab bandua ploh
Tanda Ion bohpi ka nyata
Miseue nyang ka ban Ion peugah
Afai sahbat bek talupa
Sifeuet dua ploh ka Ion peuri
Abeh dalipi ka nyata
Taklokjih ho masokjih pat
Peugah sahbat bek meutuka
Teungku deungo ulon peugah
Masok siblah bak istaghna'
Hareutoe istaghna' kaya Tuhan
Nibak alam dum barangna
Hana sapatpi tueng manfa'at
Kaya meuhad nantiasa
Langet bumoe ureueng seumbah
Han bube drah leubeh mulia
Adat han sidroepi tem sujud
Hana bacut kureueng mulia
Nyankeu nyang nyo kaya meuteulak
Hana neukheundak ubak hamba
Jinoe Ion peugah sifeuet siblah
Deungo sahbat Ion calitra
Peurtama wujud keudua qadim
Lheueh nibak nyan teuma baqa'
Muknalafah, qiyamuhu
Bu meulaku neufam makna
Sama; basar lapan kalam
Sikureueng sami'un sifeuet mulia
Siploh sifeuet nan basirun
Mutakallimun ka seumporna
Adat hana sifeuet siblah
Han sah Allah takheun kaya
Sifeuet siblah ka Ion peugah
Masokjih sah bak istaghna
Sikureueng sifeuet ho jitamong
Peugah bak keunong bek meugisa
Bak iftiqar masok sikureueng
Deungo Ion bileueng he syeedara
Hareutoe iftiqar dum beurkheundak
Ubak zat hak Po Nyang Esa
Jimeukheundak citpi na hai
Hana sagaipi na reuda
Udep mate saket mangat
Bak hadarat Nyang Kuasa
Jinoe Ion peugah sifeuet sikureueng
Sira bileueng Ion kheun nama
Peurtama hayat keudua 'ilmu
Iradat keulhee bak takira
Keupeuet qudrat limong hayyun
Keunam muridun geuboh nama
Tujoh 'alimun lapan qadirun
Ma'nawiyah geukheun nama
Sikureueng sifeuet wahdaniyah
Abeh keumah Ion calitra
Adat hana sikureueng sifeuet
Han sapeue jeuet neupeurupa
Muwoe leumoh deungon jahe
Hankeu ase alam donya
Jinoe donya ka tapandang
Dum sibarang leumah nyata
Nyankeu dali kuasa Tuhan
Sifeuet sikureueng wajeb ka na
Nyoe sikureueng dilee siblah
Bak jumeulah dua ploh ka
'Oh noe teuduek ho jitaklok
Ho jimasok jinoe takira
Sifeuet dua ploh nam nyang taklok
Tadeungo beu trok Ion calitra
Qudrat, iradat taklok bak mumkin
Han ho laen bak calitra
Han bak wajeb ngon mustahe
Beu that syater tafam mukna
Bak wajeb han taklok qudrat
Kareuna meuhad wujud ka na
Adat taklok qudrat keunan
Jeuet wajeb nyan jaed nama
Bak mustahepi han taklok
Kareuna suntok jih cit hana
Adat taklok qudrat keunan
Jih geupeunan jaed pula
Adat meunan ban neupeugah
Taklokjih sah bak mumkina
Hareutoe mumkin na dua ban
Mee na mee tan bak takira
Miseue neupeujeuet uleh Allah
Saboh gajah badanjih raya
Siribee ulee dua ribee gadeng
Hana bandeng dalam donya
Neuboh sayeuep ban leulayang
Jiteureubang u antara
La ilaha illallah
Kuasa Allah barang keurija
Miseue neupeujeuet saboh gunong
Hireuen teuceungong taeu rupa
Tanohjih meuh bateejih intan
Kayeejih ban pirak safa
Onjih pirak nyang ladom meuh
Jeuoh peungeuh jiplueng cahya
Dumna cicem jiteureubang
Ladom intan ladom mutiara
Akai teuceungong hireuen dahsyat
Bak buet qudrat Allah Ta'ala
Mumkin bak Po trang keuheundak
Ilahun haq hana dua
'Oh noe abeh haba mumkin
Jinoe laen Ion calitra
Sama', basar taklok bak mawjud
Got nyang kusot got nyang hana
Got nyang wajeb got nyang haroh
Got nyang haloh got nyang gasa
Han bak Makdum deungon mustahe
Nyata pike na bicara
Tiep-tiep nyang na leumah takalon
Meuseuki tan Ie meurupa
Miseue suara nyang bak ensan
Miseue bee-beewan dum aneka
Miseue rasa bak makanan
Meukri lakuan taeu rupa
Meuhad puteh meuhad hitam
Kalon Tuhan nyang meuhingga
Sidom jijak teungoh malam
Lam batee hitam di yup donya
Leumah neukalon uleh Tuhan
Bak lakuan meukri rupa
Nyang na mawjud dum peudeungo
Bu bak sigo le suara
Wujud nyang tan seukali-kali
Miseue mustahe banbit hana
Peudeungo han takalon tan
Bandua ban wujud hana
Sama', basar 'oh noe keumah
Jinoe Ion tamah laen pula
'Ilmu, kalam taklok teumpat
Tadeungo sahbat Ion calitra
Peurtama bak wajeb keudua mustahe
Keulhee ka ase jaed nama
Kalam Tuhan han mupatah
Hana harah ngon suara
Adat na harah kalam Tuhan
Ka sa ensan bak beurkata
Bukon ajam bukon Arab
Han ngon i'rab han ngon bahsa
Hana dilee hana dudoe
Hana sapeue ngon tapeusa
Wa'ad wa'id amar nahi
Kalam Rabbi sikrak saja
Sinan tafam amar nahi
Dum ngon janji syeuruga nuraka
'Oh noe abeh haba kalam
Eleumee Tuhan pakri rupa
Eleumee Tuhan han ek kheun kri
Neukeutahui dum peukara
Peue lom 'arasy deungon kursiy
Langet bumi abeh nyata
Hana bacutpi na silap
Hana sapat nyang han nyata
Nyang na neuthee nyang han neuthee
Han meusilee bak Rabbana
Aneuk batee meudum bileueng
Ie laot ie krueng meu'oh hingga
Dum bak kayee jeuep lungkiek gle
Naleueng di pante jeuep-jeuep donya
Meuhad hingga meu'oh sukat
Eleumee hadarat han ek juga
Hana padok uroe malam
Peue nyang ensan ho jicinta
Ho jibalek tuboh ensan
Neuthee Tuhan peue keurija
La ilaha illallah
Ate ngon lidah bek talupa
Got deungon jeuheut dalam khimat
'Oh kiamat page nyata
Soe nyang taat dum geutanyoe
Page dudoe lam syeuruga
Soe hyang maksiet dum geutanyoe
Page dudoe lam nuraka
'Oh noe abeh makna eleumee
Tuhan neuthee dum peukara
Nyang nam sifeuet taklok meuhad
Hayat syarat bansineuna
Laen nibak nam taklokjih han
Sifeuet Tuhan han ek hingga
Haba taklok 'oh noe simpan
Sifeuet Tuhan Nyang Maha Esa
Sifeuet dua ploh meuhimpon saho
Ubak zat Poteu Nyang Esa
Dali saboh madeului saboh
Fam beu teugoh bek meuriba
Alam dali Allah madeului
Dalam usui lahe nyata
Phon tateumee dilee bak alam
Lheueh nibak nyan teuma asma
Lheueh asma teuma sifeuet
Dudoe meuteumee zat haq Ta'ala
Tateumee zat seubab sifat
Qudrat iradat eleumeeNya
Tateumee sifeuet seubab isem
Nama Tuhan nyang that raya
Qadiran, muridan, 'aliman, hayyan
Seubab alam peuthee asma
Lhee boh dali meuteumee bak alam
Ase nibak nyan dali qadirun Allah Ta'ala
Nyang donya nyoe dilee cittan
Kuasa Tuhan nyang peunyata
Adat nana'kuasa Tuhan
Bandum alam hana nyata
Nyankeu geukheun ase nbak tan
Dali qadiran Allah Ta'ala
Nyan teurteuntu dali muridan
Puteh hitam maseng warna
Rupa neubri meuhad-meuhad
Hana cacat taeu rupa
Nyang ka puteh han jeuet hitam
Nyang ka agam han jeuet dara
Paneukpi mee panyangpi mee
Tuhan teuntee meuhad hingga
Nyang ka paneuk han jeuet panyang
Maseng timang nibak donya
Nyankeu geukheun dali muridan
Maseng lakuan tapeunyata
Keulhee teuma peurusuhan
Dali 'aliman Allah Ta'ala
Rupa 'aliman le ban neuboh
Tanda utoh Allah Ta'ala
Rupa binatang hana saban
Miseue ensan dum hana sa
Ban di kayee laen bangon
Miseue bungong le wareuna
Peuna peutan nyan buet qudrat
Laot darat neupeunyata
Meu'um angen meugrum bakat
Dum buet qudrat Allah Ta'ala
Mate sabe prang meucupheuek
Rimueng badeuek Tuhan peuna
Prang meuhubo matepi Ie
Rakyat beuhe buet Rabbana
Meugrup reudok meugrum ujeuen
Angen tupheuen laot keunong sa
Khueng suntok mate ngon uteuen
Dum pucok krueng abeh tho mata
Langet mupayong bumoe meudulang
Laot meulinteueng gunong meulingka
Tanda Allah han ek bileueng
Deuh bak ureueng nyang na mata
Seukalian bandum buet Allah
Neupeuleumah tanda kuasa
'Oh noe abeh makna qudrat
Jinoe iradat Ion calitra
Maseng teuntee buet iradat
Meuhad-meuhad han meutuka
Nyang kafe han eseulam
Nyang ka jahnam han syeuruga
Nyang ka nabi han keu umat
Nyang ka rakyat hana raja
Nyang ka geusyik han keu tandi
Nyang ka waki han bentara
Nyang ka bahgia han keu rugoe
Nyang ka geupujoe han geuceula
Nyang ka alem han keu jahe
Nyang ka faki hana kaya
Nyang ka puteh han keu hitam
Nyang ka agam han jeuet dara
Makna iradat 'oh noe dilee
Di eleumee teuma takira
Proe hai dali di eleumee
Laen lagee neupeurupa
Bangon neuboh rupa laen
Miseue ensan dum hana sa
Maseng kawom maseng nasib
Ladom Arab ladom Jawa
Nyang ka Arab han keu Jawoe
Le that bagoe laenpi na
Rupa binatang le ban neuboh
Tanda utoh Allah Ta'ala
Bangon siwah han miseue leuek
Bangon beurujuek han cempala
Bangon keubeue han sang sapi
Bangon bubiri han sang unta
Bangon cagee han sang lutong
Bangon seudong han sang naga
Miseue kayee laen lagee
Tuhan teuntee maseng rupa
Bangon pineung han sang panah
Bangon birah han sang kala
Bangon bak u han sang urot
Bangon bak crot han sang buga
Meunankeu dum proe lakuan
Dali Tuhan alam raya
'Oh noe abeh makna eleumee
Dalijih lhee Ion peunyata
Di qadiran dali qudrat
Meunan meuhad tabicara
Di muridan dali iradat
Meunan sahbat tafam makna
Di 'aliman dali eleumee
Meunan nyang mee tapeucaya
Di qudrat iradat dalilon
Keunan meuhimpon saboh tanda
Teuma di hayyun dali hayat
Teuma bak zat haq Ta'ala
Zat ngon sifeuet mufom saboh
Fam beu teugoh kheun ulama
A s-sifatu wa l-mawsufu wahidun
Meunan mufom sabet makna
Zat ngon sifeuet mufom saboh
Fam beu teugoh dalam dada
Hareutoe zat nyang dong keudroe
Hana sapeue hajatjih na
Hareutoe sifeuet nyang na hajat
Jidong bak zat nantiasa
Bitpi meunan han tom cre-bre
Jimeusabe sajan dua
'Oh ka na zat na di sifeuet
Han meuruweuet dudoe teuka
Miseue laot nyan ngon alon
Kayem meuhimpon sajan dua
Nyankeu Ion kheun mufom saboh
Fam beu teugoh bek meuriba
Bak meunan sifeuet dum dali zat
Leungkap mumat alam donya
Kareuna Tuhan neupumeujeuet
Ngon sifeuet peuet hase nyata
Adat kureueng saboh sifeuet
Syarat pumeujaeuet han seumporna
Meuhan seumporna syarat pumeujeuet
Han ase buet alam donya
Saboh syarat beu na hayat
Ureueng mawot buetjih hana
Bek guna buet meugrakpi tan
Han peue teelan tabicara
Keudua syarat meuhana eleumee
Ureueng dungee utoh hana
Han jitukri keu ase buet
Han sapeue jeuet kira-kira
Kayee teuboh rumoh han jeuet
Patah ngon pheuet cumeh mata
Meunankeu tamse ubak makhluk
Nyang sabe duek dalam donya
Keulhee syarat beu na iradat
Supaya meuhad buet keurija
Ureueng han kheundak buet han ase
Han jitukri buet bicara
Keupeuet syarat beu na qudrat
Ureueng leumoh that han kuasa
Hankeu na ek jipubuet buet
Badan pijuet tuboh laksa
Tuhan geutanyoe khaliqul 'alam
Sifeuet seukalian dum seumporna
Ek neupeuna ek neupeutan
Dum seukalian alam donya
Nyankeu seubab tathee na Tuhan
Seubab alam tapeunyata
Nyankeu alam jeuet keu dali
Tuhanku Rabbi madeululnya
La ilaha illallah
Pujoe Allah Tuhan Nyang Esa
Pasai dua 'oh noe simpan
Nyang lhee teelan jihoe takira
* * *
Tidak ada komentar:
Posting Komentar