BISMI L-LAHI R-RAHMANI R-RAHIMI
Goh hijrat isra Nabi neujak malam
Ngon Jibrail mula di Meusjidil Haram
Neupasang ngon buraq pantah na ban kilat
Sampoe keu Baitul Muqaddis isra meuhad
Nabi neutamong dalam Meusjidil Aqsa
Nabi seumbahyang sajan nabi dum anbia
Lheueh seumbahyang Nabi kheun grah yoh masa nyan
Lam Syeuruga Jibrail jak cok minoman
Peuet bon mangkong Jebrail cok lam syeuruga
le nyang harom rasa ladat ate suka
Saboh mangkong aer arak saboh tuak
Saboh mangkong aer madu minom galak
Saboh mangkong aer laban hana ubah
Sinan Nabi minom rijang pujoe Allah
Sinankeu phon mikreuej Nabi dua sajan
Ngon Jibrail langet tujoh sampoe jalan
Lapeh nyang phon meuteumeung deumgon Nabi Adam
Lapeh nyang dua meuteumeung 'Isa aneuk Maryam
Lapeh nyang lhee meuteumeung Yusuf nyang samlakoe
Lapeh nyang peuet deungon Idris Hud di sinoe
Lapeh limong Nabi Harun meuteumeung sinan
Lapeh nyan nam Nabi Musa aneuk 'Umran
Lapeh Tujoh meuteumeung Nabiyullah Ibrahim
Nyang po maqam nyang that aman lagi karim
Hingga leupah u yup kayee sidratul muntaha
Troh yup 'arasy hijab leupah nyang geukira
Sampoe maqam maqamahon saidil anam
Neudeungo kalam Rabbul Tzzat neumufirman
Hana heuboh had deungon hingga firman Tuhan
Hana harah ngon suara ban hayawan
Hana jihat han soe tukri nana teumpat
Hana troh fam manusia bak hadarat
Neupeureulee limong ploh watee dum seumbahyan
Ateueh Nabi neuteurimong dum sibarang
Dudoe Nabi neujak ulang lakee kureueng
Limong-limong siseuen ulang neupeukureueng
Neupeukureueng jeuep seun Nabi lakee kureueng
Hingga kureueng peuet ploh limong tinggai limong
Fahlapi sa limong watee dum limong ploh
Bek tatinggai dumna gata pubuet sunggoh
Nabi peutren nibak Tuhan le u teumpat
Nanggroe Makah nyang mulia troh Ie siat
Mantong seuuem teupat neueh hana hilang
Dumnankeu trep neujak neuwoe rijang-rijang
Nabi peugah isra mikraj dum bak umat
Ngon seumbahyang limong watee neuamanat
Abu Bakar sigra troh le di hadapan
Trang that ate bak agama neumeuiman
Han jipateh kawom Qureh jipeuayang
Jikheun pajan neujak pajan troh neuriwang
Neukheun ka troh bunoe neujak Baitul Mukaddis
Leumah ka neungieng lua dalam bandum abeh
Nyandum ureueng han cit jitem bawa iman
Bandum jikheun haba tipee nibak syetan
Kreueh that kafe yoh masa nyan nanggroe Makah
Jipeuayang jipeuseunda Rasulullah
Baranggasoe nyang han pateh Rasul Tuhan
Lam nuraka keukai sinan baranggajan
Dalam donya hana geutueng dum ibadat
Uroe dudoe keumiet nuraka di akhirat
Teutap sinan suntok masa uroe malam
Han teubiet le keukai sinan baranggajan
Dari sit muda wahe po lem bak bilangan
Sabe nyan tapareksa nibak tatanyong
Dari seubab wajeb neumeununtut dum eleumee
Bak peundita tanyong lanja neumeuguree
Beu na adab neuteumanyong di nap guree
Bek sira jak beu neubeda jeuet keu himbee
Bek nyan syarat neuteumanyong wahe polem
Miseue aduen deungon adoe beu na takdem
Wa salla l-lahu 'ala sayyidina muhammadin
Wa 'ala alihi wa sahbihi wa sallama
* * *
Tidak ada komentar:
Posting Komentar